ՀՀ մշակույթի նախարարության աջակցությամբ, <<Արվեստների Պատկերասրահ>> մշակութային հիմնադրամը՝  ս. թ.  հունիսի 16-ից հուլիսի 9-ը անցկացնում է  Հենրիկ և Գերոնտի Թալալյանների անվան ալտի և թավջութակի 3-րդ փառատոնը: Փառատոնը նպատակ ունի զարգացնելու ալտ և թավջութակ գործիքների կատարողական արվեստը Հայաստանում, խթանելու  այս գործիքների  հանդեպ հետաքրքրությունը, ինչպես նաև  նոր երկերի ստեղծման գործընթացում ներգրավելու հայ  և օտարազգի  կոմպոզիտորներին:

Փառատոնի բացման հանդիսավոր համերգը կկայանա հունիսի 16-ին, ժամը 19:00-ին, Կոմիտասի անվան կամերային երաժշտության տանը: Համերգային ծրագրում կհնչեն  Մ. Բրոնների, Յ. Յակուլովի, Մ. Կոկժաևի ստեղծագործությունները` մենակատարներ Արամ  Թալալյանի /թավջութակ/ և Ջուլիետա Վարդանյանի /դաշնամուր/ մասնակցությամբ:

Հենրիկ և Գերոնտի Թալալյանների անվան ալտի և թավջութակի 3-րդ փառատոնը բաղկացած է 8 համերգային ծրագրից, որին մասնակցում են ավելի քան  50 երաժիշտներ` արտերկրից, ՀՀ մարզերի և Երևանի երաժշտական դպրոցների սաներ, Երևանի Կոմիտասի անվան կոնսերվատորիայի ուսանողներ: Մարզային ծրագրի շրջանակներում ՀՀ մարզերի լավագույն թավջութակահարներն այս տարի հնարավորություն կունենան մասնակցելու փառատոնի ծրագրերին: Փառատոնի ընթացքում կնշվեն հայ երաժշտարվեստի երախտավորներ Հենրիկ Թալալյանի 90 և Վիլլի Մոկացյանի  80-ամյա հոբելյանները: Նարեկացի արվեստի միության սրահում կցուցադրվի աշխարհահռչակ ալտահար և դիրիժոր Ռուդոլֆ Բարշայի մասին պատմող <<Նոտա>> ֆիլմը:

Այս տարի, Հենրիկ և Գերոնտի Թալալյանների անվան ալտի և թավջութակի փառատոնն իրենց մասնակցությամբ կպատվեն` Մոսկվայի կոմպոզիտորների միության նախագահ Օլեգ Գալախովը, կոմպոզիտորներ Միխայիլ Բրոնները /Ռուսաստան/, Յակով Յակուլովը /ԱՄՆ/, ջութակահարներ Բորիս Լիֆշիցը /Շվեյցարիա/, Հովհաննես Մոկացյանը /Գերմանիա/, Ռուդոլֆ Բարշայի այրին` երգեհոնահար Ելենա Բարշայը /Շվեյցարիա/, թավջութակահարներ  Լևոն Մուրադյանը /Պորտուգալիա/, Դավիթ Մելքոնյանը /Գերմանիա/, դաշնակահար Տաթևիկ Մոկացյանը /Գերմանիա/:

Փառատոնի գեղարվեստական ղեկավարն է ՀՀ վաստակավոր արտիստ, թավջութակահար  Արամ Թալալյանը, դիրիժորներ՝ Միխայիլ Բրոններ, Յակով Յակուլով, Միխայիլ Կոկժաև:

Հունիսի 15-ին, ժամը 12:00-ին ՀՀ մշակույթի նախարարությունում կայացած Հենրիկ և Գերոնտի Թալալյանների անվան ալտի և թավջութակի 3-րդ փառատոնի մամուլի ասուլիսին մասնակցում էին ՀՀ մշակույթի նախարարության աշխատակազմի ժամանակակից արվեստի վարչության պետ Սեյրանուհի Գեղամյանը, <<Արվեստների Պատկերասրահ>> մշակութային հիմնադրամի նախագահ Մարիամ Շահինյանը, հիմնադրամի  տնօրեն Գարիկ Նազարյանը, ՀՀ վաստակավոր արտիստ, փառատոնի գեղարվեստական ղեկավար Արամ Թալալյանը, դաշնակահար Ջուլիետա Վարդանյանը, փառատոնի պատվավոր հյուրեր` Յակով Յակուլովը /ԱՄՆ/, Միխայիլ Բրոնները  /Ռուսաստան/, Միխայիլ Կոկժաևը /Հայաստան/: