ՀՀ մշակույթի նախարարության «Մշակութային կանգառ» ծրագրի շրջանակում Գ. Սունդուկյանի անվան ազգային ակադեմիական թատրոնն իրականացրեց իր նախավերջին մշակութային կանգառը Վանաձորի Հովհաննես Աբելյանի անվան պետական դրամատիկական թատրոնում:

Մայր թատրոնի դերասանները նոյեմբերի 12-ին վանաձորցի թատերասերներին ներկայացրեցին Հրաչ Բեգլարյանի «Արծվաբույն» բեմադրությունը, որը բոլոր նախորդող «կանգառներում» մեծ հաջողություններ էր արձանագրել: Վանաձորի թատրոնում բացառիկ սիրով և ջերմությամբ ընդունեցին թատերախմբին, ապա և նույնպիսի ջերմությամբ ընդունվեց ներկայացումը:

Ներկայացման մասին կարծիքներ հայտնեցին Հ. Թումանյանի անվան մանկավարժական համալսարանի ռեկտոր Գուրգեն Խաչատրյանը և Արցախյան պատերազմում զոհված զինվորների ծնողները:

Գ. Սունդուկյանի անվան ազգային ակադեմիական թատրոնի հաջորդ և այս տարվա վերջին կանգառը կկայանա Գյումրիում՝ դեկտեմբերի 9-ին:

Հիշեցնենք, որ ՀՀ մշակույթի նախարարության «Մշակութային կանգառ» ծրագիրը մեկնարկել է ս. թ. հունվարի 26-ին: Ծրագրի շրջանակում, ՀՀ և ԱՀ 110 համայնքում ընդհանուր առմամբ կիրականացվի 426 միջոցառում` թատերահամերգային ծրագրեր, ցուցահանդեսներ, կինոցուցադրություններ:

Ծրագրի գլխավոր հովանավորն է «Մարդկային ռեսուրսների «Փյունիկ» հիմնադրամը»: