ՀՀ  մշակույթի  նախարարությունը, Հայաստանի  երաժշտական ընկերությունը և Կոմիտասի անվան պետական կոնսերվատորիան` ս. թ. հունիսի 10-24-ը,   Հայաստանի երաժշտական ընկերության դահլիճում անցկացնում են ազգային նվագարանների և ժողովրդական երգի անհատ կատարողների հանրապետական 4-րդ մրցույթը`  նվիրված Սայաթ-Նովայի ծննդյան 300-ամյա հոբելյանին:

Մրցույթի նպատակն է բացահայտել ժողովրդական երաժշտարվեստի բնագավառում հանրապետության շնորհալի անհատ կատարողներին, աջակցել նրանց մասնագիտական զարգացմանը:

Մրցույթին կարող են մասնակցել  հանրապետության երաժշտական և արվեստի դպրոցների, քոլեջների, պետական կոնսերվատորիայի ուսանողները, ասպիրանտները, ինչպես նաև պրոֆեսիոնալ երաժիշտ-կատարողներ:

Մրցույթն անցկացվում է կրտսեր /մինչև 16 տարեկան/, ավագ /17-30 տարեկան/ տարիքային խմբերում, երկու փուլով և չորս անվանակարգերում`

• ժողովրդական երգ /կանացի և արական ձայներ/,
• շվի, սրինգ, դուդուկ, զուռնա,
• թառ, քանոն, ուդ,
• քամանչա, բամբիռ, հարվածային գործիք:

Յուրաքանչյուր անվանակարգում մասնակիցները պետք է ներկայանան  երեք կատարումով` մեկը պարտադիր  Սայաթ-Նովայի ստեղծագործություններից,  երկուսը`  ըստ ցանկության:

Ըստ տարիքային խմբերի` մրցույթի հաղթողների համար առանձին-առանձին սահմանվել են հետևյալ մրցանակները`

• Առաջին  մրցանակ` դիպլոմ և դրամական  պարգև /մեկ հատ/,
• Երկրորդ մրցանակ` դիպլոմ և դրամական  պարգև /երկու հատ/
• Երրորդ   մրցանակ` դիպլոմ և դրամական  պարգև /երկու հատ/

Երկրորդ փուլի այն մասնակիցները, ովքեր չեն արժանանա  մրցանակների, կպարգևատրվեն պատվոգրերով: Սահմանվում են նաև հատուկ մրցանակներ`

• մրցույթի ամենափոքր մասնակցին` «Հույսի մրցանակ»,
• մրցույթի ամենաերիտասարդ մասնակցին «Լավագույն երիտասարդ կատարողի մրցանակ»,
• Սայաթ-Նովայի ստեղծագործության լավագույն կատարման                        համար հատուկ մրցանակ,
• հատուկ մրցանակներ  կարող են շնորհվել հասարակական                        կազմակերպությունների, անհատների, ուսումնական հաստատությունների կողմից,
• ժյուրին իրավասու է չշնորհել որևէ մրցանակ, ինչպես նաև ձայների մեծամասնությամբ կիսել մրցանակը,
• մրցանակների և պատվոգրերի հանձնումը  կկայանա  գալա համերգի հանդիսավոր արարողության ժամանակ «Առնո Բաբաջանյան» համերգասրահում:

Ազգային նվագարանների և ժողովրդական երգի անհատ կատարողների հանրապետական 4-րդ մրցույթի կազմկոմիտեն նախագահում է Հայաստանի երաժշտական ընկերության նախագահ, Երևանի Կոմիտասի անվան պետական կոնսերվատորիայի վոկալ տեսական    ֆակուլտետի դեկան, պրոֆեսոր Դավիթ Ղազարյանը, կազմկոմիտեի անդամներն են` Աթանես Առաքելյանը /Երևանի Կոմիտասի անվան պետական կոնսերվատորիայի պրոֆեսոր, Ա. Սպենդիարյանի անվան օպերայի և բալետի ազգային ակադեմիական թատրոնի դիրիժոր/, Գրիգոր Ոսկանյանը /Երևանի Կոմիտասի անվան պետական կոնսերվատորիայի ազգային նվագարանների և հայ երգի ամբիոնի վարիչ/, Արմինե Ղազարյանը /ՀՀ մշակույթի նախարարության աշխատակազմի ժամանակակից արվեստի վարչության գլխավոր մասնագետ/, Ամալյա Ամյանը  /Հայաստանի երաժշտական ընկերության ավագ մասնագետ/:

Մրցույթի մասնակիցներն իրենք են ապահովում  ճանապարհի, կեցության ծախսերը, իսկ նվագակցության անհրաժեշտության դեպքում` ապահովում նաև նվագակցողին: Մրցույթի ժյուրիի որոշումները  վերջնական  են  և փոփոխման  ենթակա չեն: Ամեն փուլից առաջ մասնակիցներն ունեն մեկ փորձի հնարավորություն: Ազգային նվագարանների և ժողովրդական երգի անհատ կատարողների  վերջին երկու մրցույթների  առաջին տեղը գրաված մրցանակակիրներին  չի թույլատրվում մասնակցել այս մրցույթին:

Մրցույթին  մասնակցելու համար պետք է ներկայացնել մասնակցի 

ծննդյան վկայականի կամ անձնագրի, կրթության վկայականի պատճենները,

տեղեկանք աշխատանքի վայրից կամ ուսումնական հաստատությունից,

2 գունավոր լուսանկար   ( 3X4 չափսի), մրցույթին ներկայացվող ծրագիրը` տպագրված և մրցույթի  մասնակցության հայտը:

Մրցույթի մասնակցության դիմումներն ընդունվում են մինչև 2012 թ. հունիսի  1-ը`  Հայաստանի երաժշտական ընկերության վարչության շենքում:

Լրացուցիչ տեղեկությունների համար  դիմել Հայաստանի երաժշտական ընկերություն` Երևան, Սայաթ-Նովայի 15, հեռ.`  58-04-23,  58-95-71: